1. Luther Blissett Project
|
|
Luther Blissett al è un pseudonim doprât in plui
manieris, une "identitât vierte" cjapade sù e condividude
di centenârs di hackers, ativiscj e lavoradôrs culturâi
di diviers paîs fin dal Astât dal 1994.
Par resons che no si cognossin, il non al è stât cjolt a imprest
di un balonîr britanic di divignince indoocidentâl.
In Italie, jenfri il 1994 e il 1999, il cussì clamât Luther
Blissett Project (la rêt plui organizade dentri de comunitât
vierte che e dopre il pseudonim) al devente une vore cognossût e al
invie une sorte di liende di "eroi di popul", un Robin Hood de ete
de informazion che al coione i media dantjur notiziis falsis, al inmanee campagnis
di solidarietât scalembris pes vitimis de repression e vie indenant.
Il romanç Q al ven scrit jenfri il 1996 e il 1998 di cuatri
components de colone bolognese dal Luther Blissett Project, e al ven publicât
di Einaudi tal Març dal 1999. Tai agns daspò al vignarà
voltât par inglês, spagnûl, todesc, olandês, francês,
portughês (brasilian), danês e grêc.
I cuatri autôrs di Q si disvelin (*) ai 6 di Març dal
1999 cuntune interviste al cuotidian "La
Repubblica". Cundut dai titui sensazionalistics, lis rispuestis no
van a sbassâ la complessitât dal fenomen Luther Blissett, e no
si à nancje nissune abiure des pratichis dopradis tal passât.
"I nestris nons a àn scjarse impuartance e inmò di mancul
lis nestris storiis personâls. O sin il grup che al à scrit Q,
ma intal stes timp o sin mancul dal 0,04% dal Luther Blissett Project."
Il libri al fâs scjas pe complessitât de trame e pal so valôr
alegoric, ma ancje par vie che al ven publicât cuntune formule di "copyleft".
A restâ stranîts a son juste chei che no san che la critiche pratiche
de proprietât inteletuâl al è un cjantonâl dal Luther
Blissett Project .
Tal mês di Dicembar dal 1999 al rive insom il Plan Cuincuenâl
dal LBP. Ducj i "viei" (chei che a doprin il non fintremai dal 1994)
a metin in vore un suicidi simbolic, clamât Seppuku (suicidi rituâl
gjaponês).
Cu la fin dal progjet dut câs nol disparìs il non, che al vignarà
doprât ancjemò di plusôrs di lôr in diviers paîs.
Par savênt di plui su Luther Blissett e/o sul Luther Blissett Projetc:
http://www.lutherblisset.net
* Si fâ par mût di dî : Roberto Bui al dopre par cualchi timp un pseudonim ("Fabrizio P. Belletti"), creant ancjemò un altri paradòs identitari.
2. Wu Ming
 |
Tal mes di Zenâr dal 2000, une cuinte persone si
zonte ai autôrs di Q e al nas cussì un gnûf trop
di naratôrs, Wu Ming ("anonim" tal cinês mandarin).
Il non dal grup al vûl jessi un omaç ae dissidence e un mût
par refudâ il rûl dal Autôr tant che star.
Ognidun dai Wu Ming al à un "non di art" formât di
chel dal grup cuntune cifre determinade dal ordin alfabetic dai nestris cognons.
Fin de sô fondazion, il coletîf al à scrit romançs
e oparis di non-fiction. La opare plui impegnative e je fûr di dubi
54, romanç cun disinis di personaçs (cun dentri ancje
l’atôr Cary Grant), ancje chel voltât in plui lenghis. Dal
romanç al è saltât fûr un
cd cun musichis dai Yo Yo Mundi e cu lis vôs di Marco Baliani, Giuseppe
Cederna e Fabrizio Pagella (Il Manifesto, Mescal, 2004).
Dilunc vie dal 2004 a saltaran fûr par Einaudi i romançs di doi
components dal grup (Wu Ming 2 e Wu Ming 1) "di bessôi". Nol
è il prin esperiment dal gjenar: tal 2001 l’editôr Fanucci
al veve publicât Havana Glam di Wu Ming5.
Tal Autun dal 2004 inte salis al jessarà il film di Guido Chiesa Lavorare
con lentezza, su Radio Alice e il moviment dal ’77 a Bologne, scrit
di Guido Chiesa e Wu Ming.
Lis nestris posizions
sui dirits di autôr, i esperiments
di scriture coletive, lis nestris newsletters (Giap
e Nandropausa) e, no ultins, i centenârs
di incuintris cui letôrs inmaneâts in dute Italie e no dome, a
àn fat di Wu Ming ce che al è vuê, sei ce che al sei.
Riccardo Pedrini = Wu Ming 5
Federico Guglielmi = Wu Ming 4
Luca Di Meo = Wu Ming 3
Giovanni Cattabriga = Wu Ming 2
Roberto Bui = Wu Ming 1
|
|
Ultimo aggiornamento: aprile 2004
Traduzione in friulano: Max Mauro
Torna al menu principale